Территорисене аталанма пулӑшакан фонд Чӑваш Енӗн заявкине ырланӑ май республикӑри ишӗлекен 20 ҫуртри ҫынсене ҫӗнӗ ҫӗре куҫарма йышӑннӑ.
Ӗнер иртнӗ ларура фонд тата тепӗр 6 регионӑн заявкине ырланӑ, ҫав шутра Чӑваш Енӗнне те.
Кӑҫалхи программӑна Шупашкарти пӗр ҫурт та лекеймен. Халӗ вара Ҫӗнӗ Шупашкарти, Канашри, Ҫӗмӗрлери, Вӑрнар тата Ҫӗрпӳ районӗсенчи 20 ҫурт лекнӗ, вӗсенче 256 ҫын пурӑнать-мӗн.
Вӗсен адресӗ ҫапларах:
Ҫӗнӗ Шупашкар – Силикат урамӗнчи 12-мӗш тата 14-мӗш ҫуртсем;
Вӑрнар – Ашмаров урамӗнчи 6-мӗш тата Путевой урамри 23-мӗш ҫуртсем;
Ҫӗрпӳ – Гагарин урамӗнчи 35-мӗш, Гоголь урамӗнчи 13-мӗш, Ҫаран урамӗнчи 5-мӗш ҫуртсем;
Ҫӗрпӳ районӗнчи Хирти Тукай ялӗнчи Ҫамрӑксен урамӗнчи 13-мӗш ҫурт;
Канаш – Кабалин урамӗнчи 5-мӗш ҫурт;
Ҫӗмӗрле – Киров урамӗнчи 75-мӗш, Красноармейски урамӗнчи 1-мӗш тата 17-мӗш ҫуртсем, Мопр урамӗнчи 23-мӗш, Свердлов урамӗнчи 92-мӗш, 92а, 105-мӗш, Стройучасток урамри 9-мӗш, Тургенев урамӗнчи 17-мӗш, Угольник урамӗнчи 5-мӗш, Францев урамӗнчи 1а ҫуртсем.
Чӑваш Енре шӑпӑрлансене пӗчӗкрен ҫӗр ӗҫне хӑнӑхтараҫҫӗ. Ку вӑл ахальтен мар ӗнтӗ.
Лаша пуласси тихаран паллӑ, ҫын пуласси ачаран тесе каланӑ ваттисем.
Чӑваш Енре ачасене ял пурнӑҫне тата ял хуҫалӑхӗнчи ӗҫе юратма хӑнӑхтарас тесе ача пахчисенче агролабораторисем уҫнӑ. Паянхи куна ун пекки 137 ача пахчинче пур.
Проекта 146 аграри предприятийӗ, кооперативсемпе фермерсем хутшӑнаҫҫӗ.
Аграри лабораторийӗсем Ҫӗрпӳ тӑрӑхӗнче – 19, Муркаш тӑрӑхӗнче — 12, Шупашкар тӑрӑхӗнче – 10.
Паян, ҫурла уйӑхӗн 26-мӗшӗнче, паллӑ ентешӗмӗр, спортсмен, Олимпиада Иванова, 55 ҫул тултарнӑ.
Олимпиада Владимировна 1970 ҫулхи ҫурла уйӑхӗн 26-мӗшӗнче Ҫӗрпӳ районӗнчи Мӑнҫут ялӗнче ҫуралнӑ. Шупашкарта Ардалион Игнатьев ячӗллӗ спорт шкулӗнче, И.Я. Яковлев ячӗллӗ Чӑваш патшалӑх педагогика институтӗнче физвоспитани факультетӗнче вӗреннӗ.
Спортри утӑма вӑл Шупашкарта уҫӑлнӑ спорт профилӗллӗ шкул-интерната (халӗ вӑл вӗренӳ заведенийӗ Шупашкарти Олимп резервӗллӗ училище шутланать) вӗренме кӗнинчен пуҫланӑ. Йӗлтӗрпе чупма юратнӑ пулин те ҫӑмӑл атлетика секцине лекнӗ, унта ӑна хӑвӑрт утассине хӑнӑхма, ҫав енӗпе тӑрӑшма сӗннӗ. Икӗ эрне тренировка ирттернӗ хыҫҫӑнах вӑл республика чемпионки пулса тӑнӑ. Унтан Раҫҫейри ӑмӑртусенче ҫӗнтернӗ. Кайран XXVIII XXVIII Ҫуллахи олимп вӑййинче кӗмӗл призер пулса танӑ, унсӑр пуҫне вӑл — тӗнче чемпионики тата рекордсменки.
Чӑваш Ене ҫӗнӗ 39 автобус ҫитнӗ. Вӗсем авӑнӑн 1-мӗшӗнчен ачасене илсе ҫӳреме пуҫлӗҫ.
Ытларах автобуссене Канаш, Вӑрнар, Хӗрлӗ Чутай, Шупашкар округӗсене ярӗҫ. Комсомольски, Ҫӗрпӳ, Елчӗк округӗсене икшер автобус лекӗ. Элӗк, Патӑрьел, Йӗпреҫ, Куславкка, Красноармейски тата ытти округа (пӗтӗмпе 10 округа) пӗрер автобус парӗҫ.
Ҫавӑн пекех Ҫӗрпӳ агротехникумне, Ҫӗмӗрлери политеха, Шупашкарти тата Ҫӗнӗ Шупашкарти колледжсене те автобус лекӗ.
Путвала дезинфекци тунӑ чухне тӗтӗмпе наркӑмӑшланса вилнӗ.
Ку инкек Ҫӗрпӳ округӗнчи Чурачӑк ялӗнче ӗнер, ҫурла уйӑхӗн 1-мӗшӗнче, пулнӑ. 1939 ҫулта ҫуралнӑ арҫын гаражри путвала дезинфекцилес тесе унта лӑсӑллӑ йывӑҫсен йӗкелне чӗртсе янӑ.
Вӑл ҫавӑнтах тӗтӗмпе наркӑмӑшланса вилнӗ. Унсӑр пуҫне тепӗр 6 ҫын наркӑмӑшланнӑ: хӗрӗ тата кӳршисем. Вӗсем арҫынна ҫӑлма хӑтланнӑ, халӗ токсикологи уйрӑмӗнче сипленеҫҫӗ.
Следовательсем халӗ следстви умӗнхи тӗрӗслев ирттереҫҫӗ.
Ҫӗрпӳ районӗнчи Туҫи ялӗнчи И.Н. Ульянов ячӗллӗ ял хуҫалӑх кооперативӗнче рабочи склад тӑрринчен персе аннӑ.
Ҫу уйӑхӗн 27-мӗшӗнче арҫын склад ҫивиттине сӳтнӗ. Инкек ҫавӑн чухне пулса иртнӗ. 1,8 метр ҫӳллӗшӗнчен ӳксен арҫын суранланса пӗтнӗ тата шӑммине хуҫнӑ.
Тӗпчевҫӗсем палӑртнӑ тӑрӑх, инкек предприятире ӗс хӑрушсӑрлӑхӗн правилине пӑхӑнмаран сиксе тухнӑ. Арҫыннӑн ятарласа ҫыхӑнмалли хатӗр те пулман.
Пӑтӑрмах тӗлӗшпе РФ Пуҫиле кодексӗн 143-мӗш статйин 1-мӗш пайӗпе пуҫиле ӗс пуҫарнӑ.
Ҫӗрпӳ округӗнчи Виҫикасси ялӗнче пурӑнакан Малышевсем туй тунӑранпа ҫур ӗмӗр ҫитнӗ – вӗсем ылтӑн туя паллӑ тунӑ.
Юбилярсем хӑйсем каланӑ тӑрӑх, вӑхӑт сисӗнмесӗрех иртнӗ. Ҫак ҫулсенче вӗсем йывӑрлӑхсене хыҫа хӑварса иртнине ӑшшӑн, йӑл кулса аса илеҫҫӗ.
Муркаш тӑрӑхӗнчи Ҫулав ялӗнчи Ершовсем те ылтӑн туя паллӑ тунӑ. Римма Трифоновнӑпа Юрий Николаевич шкулта паллашнӑ, 1975 ҫулта пӗрлешнӗ. Вӗсем иккӗшӗ те пурнӑҫне ачасене вӗрентессине халалланӑ.
Чӑваш Енре ӗнер Ҫӗрпӳ округӗнче «Уй кунӗ» курав уҫӑлнӑ. Ӑслӑлӑхпа тӗпчев институчӗн аграри секторӗн территорине Раҫҫейри 15 регионти 69 предприяти пухӑннӑ. Вӗсен йышӗнчен 28-шӗ – техникӑпа тата ӳсен-тӑрана хӳтӗлемелли хатӗрсемпе тивӗҫтерекеннисем.
Ҫӗнӗлӗхсенчен пӗри – урапаллӑ «Агромаш-Lovol 904» трактор. Ӑна Шупашкарти «Агромаш» предприяти туса кӑларнӑ. Унпа ял хуҫалӑхӗнчи йывӑр ӗҫсене пурнӑҫлама пулать.
Паян курав малалла пырать.
Ҫӗрпу тӑрӑхӗнче урнӑ тилле пула карантин тесе йышӑннӑ. Чару мерисем пирки калакан хушӑва республика Элтеперӗ Олег Николаев алӑ пуснӑ. Карантин вӑхӑчӗ утӑ уйӑхӗн 16-мӗшӗнче пуҫланнӑ.
Урна тилӗ «Солнышко» пахча юлташлӑхне пырса кӗнӗ. Ветеринарсем анализ тунӑ та тилӗ чирлӗ пулнине палӑртнӑ.
Халӗ ветеринарсем чир вырӑнне сиенсӗрлетессипе ӗҫлеҫҫӗ.
Ҫӗрпӳ округӗнче арҫын путса вилнӗ. Ку инкек ӗнер каҫ кӳлӗм Рынкӑ сали ҫывӑхӗнчи Фермер пӗвинче пулнӑ.
Арҫын путни пирки Республикӑри ҫӑлавпа шырав службине 16 сехет те 20 минутра пӗлтернӗ. Водолазсем пӗвере унӑн виллине тупса ҫыран хӗррине илсе тухнӑ.
Палӑртса хӑварар: кӑҫал ҫулла пуҫланнӑранпа 11 ҫын путса вилнӗ.
+3.3 °C